لە سەرەتای ساڵی ٢٠٢٤دا، لەسەرداوای سکرتاریەتی تۆڕەکە، ئۆفیسی سلێمانی ڕاپۆرتی چالاکیی چوار ساڵی سلێمانی پێشکەش کرد، کە پێکهاتبوو لە داتای چالاکیی و پشتگیریی بەردەوامی پارێزگاری سلێمانی بۆ سێکتەرەکە، و هەمەڕەنگیی دەزگا و ڕێکخراوە ئەدەبیی و کولتورییەکان، و زیندوێتیی ئەدەب و ئەدیبان و نووسین و وەرگێڕان و داهێنان لە شارەکەدا.
لە هەڵسەنگاندنێکدا، کە شاری داهێنەری (سیاتڵ)ی ئەمریکا بە نوێنەرایەتی تۆڕەکە ئەنجامیدا، بەشداریی و نوێنەرایەتیەکانی بەڕێز پارێزگار و ئۆفیسی سلێمانی لە دیدارە نێودەوڵەتیەکانی تۆڕەکەدا، و هەوڵە دیجیتاڵییە ناوازەکانی ئینستیتیوتی کەلەپوری کوردیی و بنکەی ژین، و کاری چاپ و وەرگێڕان و دەزگاکانی وەرگێڕان لە شارەکەدا؛ بە نایاب نرخێنراون.
ئەوەش خراوەتەڕوو، کە سلێمانی لەو ماوەیەدا بەشێوەیەکی بەرچاو دەسپێشخەریی پرۆژەی نێودەوڵەتیی و بەشداریی پرۆژەی نێودەوڵەتیی شارەکانی تریشی کردووە، و پەیوەندیی بەهێز و پڕبایەخ و کاری پێکەوەیی لەنێو تۆڕی شارە ئەدەبیەکاندا بنیاتناوە و کولتور و ئەدەبی کوردیی پێ ناساندوون.
