شاری سلێمانی لە ١٧٨٤ دا لەلایەن ئیبراهیم پاشای بابانەوە دامەزراوە و مەڵبەندی چەندین مێژوونوس و سیاسیی و رۆژنامەنوس و لێکۆڵەر و هونەرمەند و شاعیر ونوسەری وەک نالی و مەحوی و بێکەس و پیرەمێرد بووە. سلێمانی گەورەتریین شاری هەرێمی کوردستانە و ژمارەی دانیشتوانی نزیکەی (٢.٤٨٦.٤٨٦) هاوڵاتیە و ڕووبەرەکەی نزیکەی (٢١.٠٧١) کم^٢ دەبێت. شانبەشانی کولتوور و هونەر، پیشە و کارسازیی سەرەکیی شارەکە بریتیە لە کشتوکاڵ و فێربوون و خوێندن و بایەخی تەندروستی و گەشتیاریی و کایە پەرەسەندووەکانی وەک کارگە وپیشەسازیی و وزەی نوێبووەوە. بە هاوکاری پارێزگاری سلێمانی، بەڕێوەبەرایەتی گشتی ڕۆشنبیری و هونەری سلێمانی و چەندین دام ودەزگا و سەنتەری هونەری و ئەدەبی  و کەسایەتی دیار و لێهاتووی بواری  ڕۆشنبیری شاری سلێمانی، ناوەندی کلتوری و توێژینەوەی کەشکۆڵ داواکاری نازناوی شاری ئەدەبیی پێشکەشی پرۆگرامی شارە ئەدەبییەكانی یونسکۆ کرد، کە تۆڕيکە لەلایەن یونسکۆوە سەرپەرشتی دەکرێت، و شاری سلێمانی وەک شاری داهێنەری ئەدەب لە ڕۆژی ٣١ ی ١٠ ی ٢٠١٩ دا لەلایەن یونسکۆوە ناسێنرا و چووە ڕیزی ٢٤٦ شاری تر کە لەو تۆڕەدا لە سەرانسەری جیهاندا ئامادەییان هەیە و لە بوارە جیاوازەكانی وەک ئەدەب، سینەما، موزیک، کاری دەستیی و فۆڵکلۆر، دیزاین و خواردنسازییدا نازناوی شاری داھێنەری یونسكۆیان پێ بەخشراوە. شارە داهێنەرەکان لەپێناو ئامانجێكی هاوبەشدا بۆ بەھەندگرتنی داهێنان و پیشەگەریی کلتوریی لە نێوجەرگەی پلانی بەرەوپێشبردنی شارەکانیاندا لەسەر ئاستی ناوخۆیی وهەماهەنگی چالاکانە لەسەر ئاستی جیهانی پێكەوە كاردەكەن.