ڕێکەوتی ١٤ی تشرینی دووەمی ٢٠٢٤، بەبۆنەی یادی ٢٤٠ ساڵەی بنیاتنانی شاری سلێمانییەوەو بەمەبەستی بەرزڕاگرتنی ئەم یادە، چەند چالاکییەکی جۆراوجۆرو فراوان لەلایەن دەزگا حکومیی و ناحکومییەکانەوە ئەنجامدرا.
چالاکییەکان بریتی بوون لە مەراسیمێکی ڕێزلێنان، کە سەنتەری ڕۆشنبیریی و کۆمەڵایەتیی بابان بە هەماهەنگیی بەڕێوەبەرێتیی گشتیی ڕۆشنبیریی و هونەری سلێمانی، ڕێکیخستبوو. هەروەها ئەنجامدانی پیشانگای نێودەوڵەتیی سلێمانی بۆ گەشتوگوزارو ئۆتۆمبێلی ئۆف ڕۆد، کە بەبەشداریی چەندین وڵات لەلایەن بەڕێوەبەرایەتی گشتی گەشتوگوزاری پارێزگای سلێمانییەوە بە هەماهەنگیی ژووری بازرگانیی و پیشەسازیی سلێمانی و کۆمپانیای ئەتڵەس ئەلئەسیڵ، سازکرابوو. لەلایەکی دیکەوە دەزگای ڕوانگە بە هەماهەنگیی بنەماڵەی میرایەتیی بابان و چەند دامەزراوەیەکی تر، لە مەراسیمێکدا یادی مێژوویی بنیاتنانی شاری سلێمانییان کردەوە. ئەمانەو چەندین چالاکی ئەدەبیی و هونەریی و وەرزشیی و کۆمەڵایەتیی و ژینگەیی و پەروەردەیی لەلایەن ئامادەیی و خوێندنگەکان و هەڵمەتی نەمامناشتن لەلایەن شارەوانی سلێمانی ئەنجامدران.
ئۆفیسی سلێمانی شاری داهێنەری ئەدەبی یونسکۆ، پیرۆزبایی خۆی بۆ ئەم یادە مەزنە ڕادەگەیەنێت و دووپاتی دەکاتەوە، کە بەردەوام دەبێت لە پارێزگاریکردن لەم نازناوە شایستەیەی بۆ شاری سلێمانی بەدەستهاتووە.
هەروەها د.هەڤاڵ ئەبوبەکر پارێزگاری سلێمانی، بەم بۆنەیەوە پەیامێکی بڵاوکردەوە، کە ئەمە دەقەکەیەتی:
خەڵکی جوامێرو دانشمەندی شاری سلێمانی
لە یادی دوو سەدو چل ساڵەی بونیاتنانی شاری سلێمانیدا، وەک درێژەپێدەری گەشەو ڕەوتی شارستانێتیی قوڵ و ڕەسەن و بەردەوامی دەیان هەزار ساڵەی ژیانی مرۆڤایەتیی لەم ناوچەیەدا، کە کۆنترین شوێنەوارو شارستانییەتی بەردەوامیی مرۆڤایەتییە، بەناوی پارێزگای سلێمانییەوە؛ پیرۆزبایی و پێزانین و پشتیوانیی خۆمانتان پێشکەشدەکەین، لەگەڵ ئێوەی بەرزو بەڕێزدا؛ پیرۆزبایی لە هەر کوردو کوردستانییەک لە هەر پنتێکی دنیاداو لە سەرجەم مرۆڤایەتیی دەکەین.
شاری سلێمانی لە مێژووی نوێدا، وەک شارێکی نوێ و هاوچەرخ لەلایەن میرایەتیی بابان و بەتایبەتیی میر ئیبراهیم پاشای بابانەوە، لە ساڵی ١٧٨٤دا، لەسەر خاک و ماک و ناوو ئاوو هەناوو هەتاوی کانێسکان و مەڵکەندی، لە سەر بنەمای شارستانێتیی ئەو دەمە کە پیشەسازیی و بازرگانیی و ڕۆشنبیریی بووە، وەک پایتەخت بەپێی پێویستیی و تێگەشتنە ئەندازیاریی و شارسازییەکان، وەک زانکۆیەکی کۆمەڵایەتیی ئابوریی سیاسیی؛ بنیاتنراوە، لە شوێنێکدا کە بەدرێژایی مێژووی کۆن و نوێ بایەخێکی گەورەی بازرگانیی و جیۆپۆلەتیکیی هەبووەو هەیە، دواتریش منەوەرانی کورد بە ئەزمون و زانست و تێگەیشتنی ژیرانەی خۆیان؛ پایەکانی پەروەردەو فێربوون و ئازادیی و بەشداریی ژنان و هونەرە جوانەکانیان بۆ زیادکردووە، لەو دەمانەوە ئەم شارە بۆتە خۆری دەرکەوتووی نیشتمانی زاگرۆس و کراوەترین کۆمەڵگای کۆمەڵایەتیی ناوچەکە.
ئەم شارە هەر لەسەرەتاوە لەسەر بنەمای کۆکردنەوەی جیاوازەکان دروستبووە، خانەو لانەو بەرهەمی پیشەگەریی و نوێگەریی و چاو لە گەشەو ئایندەبووە، لەگەڵ هەستیاریی دۆخەکان و تەماعی بەردەوامی ئیمپراتۆرییەت و دەوڵەت و دەسەڵات و وڵاتانی ناوچەکەو دوردا؛ لەگەڵ زۆرانبازیی و ململانێ و دەستشکاندنەوەی بەردەوامیی براکاندا، لە دۆخی خۆسەریی و داگیرکارییدا، ملینەداوەو چەقی تێکۆشان و سەنگەری بەرەنگاربوونەوەو خۆبەدەستەوەنەدان بووە، نهێنیی مانەوەو گەشەکردن و بەردەوامبوونی؛ خودی ئەو جیاوازییانەبووە کە هێزی نوێی لە دۆخی نوێدا پێبەخشیوە، ئەو تێڕوانینە ڕوونەی بووە بۆ ئایندەو ئەو خۆڕاگرییەی بووە بۆ تێپەڕاندنی سەختییەکان.
نە غەدرو نە غوبن و نە غیرەو نە ئەغیار، نە بێباکیی دەسەڵاتدارانی ناوخۆیی و نە وەحشیگەرێتیی دوژمنان؛ چۆکیان پێدانەداوە.
هەموو داگیرکەرو دیکتاتۆرو بتەکانی خستووەو شکاندووەو خۆی وەک پیرەمەگروون بە پێوە ماوە.
سەروەرییە بەردەوامەکانی ئەم شارەو قوربانیی و جەرگسوتان و دڵشکانەکانی کردۆتەوە بە هێزو ئیرادەو هەستانەوە، تا ئەوەی ئەمڕۆ پایتەختیی ڕۆشنبیریی هەرێمی کوردستان و پایتەختی ئاشتیی و پێکەوەژیانی عیراقی فیدراڵ و شاری داهێنەری ئەدەبی یونسکۆو خاڵێکی گەشی سەر چەندین سێکتەری شایستەی نێودەوڵەتییە.
لەم یادەدا؛ دەخوازین گیانی یەکترقبوڵکردن و لێبوردەیی، کۆکردنەوەی ناکۆک و جیاوازەکان، ئاشتیی و سەقامگیریی، دادپەروەریی و هاووڵاتیبوون، بەهێزتر بکرێت، ئەزموون لە شکست و دووبەرەکیی و ناکۆکیی و هەڵەکانی ئێستاو ڕابردوو وەربگیرێت، بۆ ئەوەی سلێمانی و هەموو پنت و بستێکی ئەم نیشتمانە ئارام و ئاوەدان بێت.
درود بۆ ئەوانەی بە سلێمانیان بەخشی، سوپاس بۆ ئەوانەی لەگەڵی مانەوە، سەروەریی بۆ ئەوانەی بۆی ژیان بۆی تێکۆشان بۆی مردن.
درود بۆ سلێمانی..
